![](https://blogger.googleusercontent.com/img/b/R29vZ2xl/AVvXsEjtu6FzQHAnGejD-4En9HgTDi0fhUGXxekRTkQklSdaTAtlr7wF704LnOgzD_C1_KlM45qeFL3HAhpZ682Hy7wZWNISi6WKKlkp19vwR6ixyhOuGIsosDlgsiwE_P47IcNRz7KTkw9lO02Q/s400/%D8%B7%D9%81%D9%84%D9%87+%D9%86%D8%A7%D8%A6%D9%85%D9%87.bmp)
من كام سنه كده وأنا صغيره،مش صغيره أوى يعنى (:كنت نايمه فى هدوء وسلام،وفجأة سمعت صوت دبة رجليها فى البلكونه وقفزاتها السريعه المريعه ،قمت من على السرير وأنا نايمه، تقريبا كده افتكرت نفسى بحلم خير اللهم اجعله خير إنى فى بيت أشباح أو فى زار (:،مسكت البطانيه وفضلت أصرخ وألف فى دايره وأنا نايمه تماما ومغمضه عينيا، وياحرام أختى الصغيره من حزن حظها كانت نايمه جنبى فى اليوم ده صحيت وفضلت تلف ورايا بس من غير البطانيه،بابا صحى على صوتى وجى بسرعه يلحقنى قبل ما أفتكر البطانيه بساط سحرى وأنزل بيها من الدور الخامس!،وبعدين صحانى وفضل يهدينى وفتح البلكونه وعرف مين المجرمه اللى رعبتنى وعملت فيا كل ده طلعت قطة مزعجة ملهاش بيت ولا عيله ولا قلب علشان تعمل كل ده فى واحده بتخاف من خيالها ومن بذر الليمون:(،اتخضيت من خيالى مرة لما النور قطع ومسكت شمعه شفت حد واقف على جنب صرخت وبعدين لقيته بيعمل نفس حركاتى فاكتشفت إنه أنا،وبذر الليمون ده حكايته غريبه شويتين ،وأنا أصغر من كده كمان شويه ،كنت طفله شقيه جدا ودايما أبهدل البيت لماما وهى تتعب وتنظف ،خصوصا بذر الليمون عمرى عمرى ما رميته فى سلة دايما كان ع الأرض ،قالت لى عارفه لو عملتى تانى كده إيه اللى ممكن يحصل لك ؟قلت لها بسرعه وبفضول الأطفال إيه ؟إيه؟ قالت لى هيجرى وراكى بالليل ويشكك زى الدبوس ويقول لك بترمينى ليه؟،بجد صدقتها وفعلا خفت منه ،وبعد ما عرفت إنها كانت خدعه من مامتى حبيبتى،بقيت بحس بارتياب كده وشك فى بذر الليمون!ودى كانت حكايتى مع التوتر والخوف ،أعتقد إن اللى زيى التوتر نفسه هيجى له توتر منها!.
هناك 9 تعليقات:
لالالالا
دا مش توتر
دى هيستيريا علنى ومناخوليا بالمحشى معصور عليها ليمون مخلل وشوية سمك بالفنيك
بجد ضحكت كتيييييير
من وانا صغير وانا كنت باخاف من واحد جارنا بس لما اتعاملت معهمن فترع قربه جدا جدا اكتشفت انه اطيب اهل المكان
تحياتى دوما
السلام عليكم ورحمة الله وبركاتة
كل دا ياحنين على شان قطة
عجبنى جدا الجزء دا
قطة مزعجة ملهاش بيت ولا عيله ولا قلب علشان تعمل كل ده فى واحده بتخاف من خيالها
والاجمل اتهامك للقطة ان لا ليها عيله ولا قلب
هههههههههههههههههههههههه
ههههههههههههههههههههههههههه
بجد انا اول ماقريتها مت على نفسى من الضحك لانى تخيلت المنظر
اقل مايقال
اسلوبك جميل جدا فى الكتابة اختى الغالية يتميز بالبساطة وخفة الدم
تحياتى الى شخصك الكريم
الأزهرى
ميرسى على رأيك (:
ههههههه
أهم حاجه يكون البوست عجبك
منور المدونة دايما(:
محمود حسن العدل
وعليكم السلام ورحمة الله وبركاته
ميرسى جدا على رأيك
ويارب دايما تعجبك كتاباتى المتواضعه
نورت المدونة 0:
وكما وعدناكم بأن تستمر حملتنا وتأتي بكل جديد
ضيف حوارنا هذه الرسالة :::
الأستاذ معتز شاهين - باحث تربوي
صاحب مدونة إحنا وهما
وهي مدونة تهتم بالإستشارات التربوية
نتمني منكم المشاركة معنا في الحوار لمزيد من الإستفادة ولمزيد من الإفادة
مع تحياتنا
أسرة رابطة هويتي إسلامية
والله زي العسل يا حنون :)
بس بلاااااااش توتري نفسك
انا مستعده ارمي بذر الليمون اللي في الدنيا كله عشان خاطرك :)
وحشتيني اوي :(
نسيت اقولك
ليكي عندي تدبيسه
اقصد تاااج :)))))
لاااااااازم تجاوبيه
ومفيش اعذااااار
هستني اجاباتك يا حنون :)
انت اللى عسل يا جوجو يا حبيبتى
وبعدين انا مقدرش ارفضلك تاج
اكيد موافقة وربنا يستر ههههههه
؛)
ايه الرعب دة
جمدي قلبك شوية
إرسال تعليق