الأربعاء، 11 نوفمبر 2009

ليه؟...........

ليه؟
ليه دايما لما نحب أوى أصدقائنا -حبايبنا-اخواتنا ؟....بنتعب أوى بنخاف أوى على زعلهم وعلى مشاعرهم لدرجة اننا ممكن نقتل مشاعرنا وقلوبنا علشانهم؟
ليه مش بنفكر فى مشاعرنا شويه زى ما بنفكر فى مشاعرهم ؟..طيب ليه ربنا خلق الحب فى قلوبنا وليه خلق جوا كل إنسان فينا طاقة حب مختلفة يعنى بتزيد وتقل من شخص للتانى ..أنا شايفه إن كل ما طاقة الحب دى زادت كل ما كان الإنسان جميل وبريء كل ما كان الإنسان إنسان حقيقى ،بس للأسف فى بعض الأشخاص ذوى العقول والقلوب المتحجرة بيشوفوا إن دى سذاجة أو مبالغة فى عطاء الحب !
ربنا خلقنا ليه ؟خلقنا علشان نعمر الأرض ونكون خلفاء ليه ،يعنى أكيد مش هينفع نعمر الأرض غير لو الحب جوانا ،مش هنقدر نتحمل أعباء الدنيا وهمومهاوأحزانها لو مش فى حياتنا الحب ،وكل ما الحب ده زاد كل ما حياتنا زادت قيمتها ومعناها.
المفروض إن الحب اتخلق لسعادة الإنسان مش لتعاسته ،المفروض نقدر الناس اللى بتحبنا ولو مش قادرين على ده يبقى نواجه نفسنا بإن حبهم كتير علينا ،أنا مش بقول كلام صعب تطبيقه ولا مجرد شعارات مثالية ،أنا واجهت نفسي بده لما حسيت قد إيه حب أمى كتييييييير عليا !،قد إيه هى بتسامح وبتنسى !‘قد إيه عندها طاقة حب لو وزعتها على الدنيا كلها هتعيش فى سلام وخير !ومش بقول ده لأنها امى لكن هى دى الحقيقه ،الأم دايما رمز للعطاء والحب اللانهائي،وأجمل وأرق حب فى الكون حب الأم.
ننزل شويه لحبنا إحنا ،هو عيب إن كل واحد فينا تكون جواه طاقة حب كبيره ؟هو عيب إننا نعبر عن حبنا ده للناس اللى بنحبهم ؟
الحب هبه من الخالق وكل ما كان الإنسان جواه طاقة حب كبيره كل ما كان ربنا راضي عنه ،بس ياريت طاقة الحب دى تستغل استغلال سليم ،وياريت الناس اللى بنقدم لهم الحب ده يكونوا فعلا جديرين بيه.
لما يصطدم الحب ده بعالم مادى متجمد ،ويبقى مجرد مشاعر طفولية ساذجة !لما يتقابل بالاستهتار واللامبالاة ،أكيد أكيد هيموت ولو عاش هيتعب أوى وهيؤلم صاحبه أوى،عموما لو حد شايف إن مشاعر الحب الكبيره ممكن تكون مشاعر طفولية ...ياريت كلنا نمتلك المشاعر الطفولية دى ،وياريت نعرف نحب بعض ونخاف على بعض ،ياريت نقتل جوانا الأنانيه والاستهتار بمشاعر الغير،ونواجه نفسنا بعيوبنا بدل ما ندور على عيوب غيرنا .
وفى النهايه نفسى حد يقول لى ليه؟................

كتبت البوست ده لأنى بفتقد أيام طفولتى وكل أصحابى من أيام الطفولة ،وحاسه بثورة على الدنيا بحالها وعلى كل الأوضاع المزعجة الغريبه اللى بنتعامل معاها كما لو كانت عاديه جدا .




الأغنيه دى بتغير الدنيا من حواليا فى لحظة!

هناك 4 تعليقات:

احمد على نصار يقول...

: ما فائدة الدنيا الواسعة.. إذا كان حذاؤك ضيقا؟!
جملة قالها جون وليامز .. واضيف .. مافائدة الدنياالواسعة اذا كان احساسك ضيقا .. الاحساس بالآخر . والاحساس اشمل واعم من الحب فإذا الانسان احس بغيره شمله بعطفه وحبه وحنانه .. والآن وفى هذا الزمان .. انعدم الاحساس إلا احساس واحد ..الاحساس بالمادة وجمع الثروات وكأن الدنيا ستبقى لهم ابد الدهر وكأن ثرواتهم سيحتفظون بها معهم فى النفق المنظلم .. لا يبقى من الانسان إلا عمله وسيرته وكلمه طيبه يرددها الناس بعده وليتهم يعلمون
تحياتى لمشاعرك البريئة .. الم اقل لك أنكِ تستحقين كوكب تانى

mohamed ghalia يقول...

ليه انتى مختفية طيب

Israa El-sakka يقول...

انتي خسارة في الدنيا دي يا نونة ..على فكرة الأنسان اسهله انه يكون متبلد المشاعر عشان ميوجعش دماعة و قلبه مع الناس التانيين و إن كنت معرفش حيتسمر إزاي ...
أحيكي على الموضوع التحفة و متزعليش نفسك

romansy يقول...

كل عام والمسلمين فى مصر والعالم الاسلامى بكل خير ومحبة وسلام لكل الانام

عيد اضحى سعيد

اعاده الله على الجميع بالامن والاستقرار

والسرور والتسامح