الخميس، 16 ديسمبر، 2010

مشاعر متفرقة





-بقالي كتير مش بدخل المدونة ،مش فاكرة قد إيه؟بس كتير قوي يعني.
مش فاكره الباسوورد :D وتعبت قوي لغاية ما عرفت أغيره علشان أدخل هنا.
المدونة دي بالنسبة لي مكان بلاقي نفسي فيه بجد،وبحب أشارك معايا الناس اللي بحبهم فيها..مش علشان يقولوا لي رائع وبرافو وهايل،علشان يحسوا كلامي مش أكتر .
ومعظم مواضيعي ماهي إلا فضفضات ،فيه بعض الأعمال الأدبية بس مش كتير يمكن علشان بنزل نوت على الفيس بوك باستمرار ،وعلشان كمان بقالي شهور باستعد لأول كتاب ليا اللي هيحتوي مجموعة خواطري، واللي بقالي فترة بكتبه بإتقان قوي ..وبقلق قوي.. وبحب قوي.
المهم من غير رغي كتير..في كمية مشاعر جوايا حبيت أخرجها في توبيك جديد هنا في مكاني البسيط.

-السنة الجديدة بتدق الأبواب والشبابيك وكل حاجة،ودايما بخاف قوي من بداية كل حاجة !كل حاجة !،بس باستعين بحبي لربنا وثقتي فيه وتوكلي عليه وهو عمره ما خذلني ،وزي ما قال حليم الله يرحمه:ربنا دايما بيفرجها وهيفرجها ،وقت ما قال الجملة دي في مشهد من مشاهد الفيلم اللي بيمثل قصة حياته السما مطرت !..من أروع المشاهد اللي ممكن تشوفها في حياتك ،واللي ممكن تمسح عنك هموم الدنيا كلها في لحظة.
مهم جدا إن كل واحد فينا يحاسب نفسه هو عمل إيه من السنة اللي فاتت للسنة دي؟
حقق إيه وإيه ما حققهوش؟
غلط في إيه؟وإيه كان صح فيه؟
اتغير في إيه؟وهل التغيير ده كان للأجمل وألا الأسوأ؟

-أكتر حاجه ماليه عليا حياتي دلوقتي شغلي مدرسة مسرح في مدرسة إبتدائي وإعدادي ،يمكن بعض الناس يستهتر بالتخصص ده ،بس أنا مقتنعة تماماً إن الأطفال محتاجين قوي اللي يدور ويفتش عن كل جميل وفنان جواهم ؛لأن دلوقتي اللي ماعندهوش موهبة أو مهارة في حاجة معينة ،غالباً مستقبله هيكون مابين الحياة والموت!،أو هيعيش حياة روتينية مملة من البيت للشغل ومن الشغل للبيت .
بحب المدرسة جداً،بحب الأطفال جداً جداً ،ومن أول يوم ليا في شغلي بقينا أصحاب قوي وقريبين لبعض أكتر شوية من علاقتي بالمدرسين.
اكتسبت صديق جميل صغير بعتبره أخويا وابني متعلقين ببعض روحانياً،بنخاف على بعض ..بنحترم بعض جداً ،وهو أكيد يعني عارف نفسه كويس عايزة أقول له في بداية السنة الجديدة:"ربنا يخليك ليا يا ابني البريء .. العبقري ،وانت هدية ربنا ليا السنة دي،وكل سنة وهنفضل أصحاب لغاية ما أكبر وأعجز وأتسند عليك بدل العكاز ،هستغلك بقى يا كتكوتي".

-اتغيرت.. أنا عارفه،كان لازم أتغير علشان كبريائي وكرامتي اللي مقدرش أتهاون فيهم ،وعلشان اكتشفت إننا مش عايشين في مدينة الملائكة ،ولا الدنيا حلوة ولا أي حاجه ..آه والله!:D

لكن ده مش معناه إني ملاك وسط شياطين ،أنا بلافخر إنسانة ،نفسي ألاقي كل اللي حواليا بيتعاملوا مع بعض بشوية آدمية !،لكن ده لا يمنع إن في ناس قريبين ليا بثق فيهم وبحبهم جداً لأنهم حقيقيين جداً ،أما الغير كده بتعامل معاهم بسطحية شديدة .
الحنين ..دايما بيشدني لكل حاجاتي ولحياتي القديمة ،خير اللهم اجعله خير ..نفسي أرجع طفلة من أول وجديد :D،بقالي فترة بسمع أغاني قديمة كنت بسمعها زمان ،وبشوف فيها صور من الماضي ،وبستنشق عبير جميل وهادي نفسي يرجع !

ما بحبش الأشخاص الأغبياء .. الغير مسئولين..المستهترين..المتعصبين ..المتهاونين..وما أكثرهم للأسف!

لسه طفلة !عارفة ..بحس إن روح الطفلة اللي جوايا عمرها ما هتكبر رغم كل حاجة وأي حاجة وبحسها نعمة ربنا ليا ،بحب العرايس بشدة بجنون بقوة فظيعة يعني:D
عندي عروسة بحبها وبموت فيها معايا من سنين اسمها حبيبة ،جيبت لها أخت وسميتها فيروز من الحاجات البسيطة اللي بتفرحني وبتملى الدنيا عليا،نفسي أجيب قطة جداً جداً جداً وهسميها فيروز برضه ،يارب ألاقيها

-وفي النهاية في مشاعر جوايا من زمان مش عارفه أحكيها ،ولو عرفت مش هعرف أحكيها إزاي ولمين؟ ،بس عارفه إن ربنا حاسس بيا وبضميري وشايفني من جوا قوي أكتر من أي حد وده كفايه عليا.

وكل سنة وانت طيبين ..ويارب تبقى سنة جميلة في حياتكم وتحققوا كل اللي ما اتحققش السنة اللي فاتت ،شيلوا الشوائب اللي جواكم ..كونوا بني آدمين حقيقيين ،ابكوا وخرجوا كل شيء بيوجعكوا ..وافرحوا بآدمية .

وجودكم يهمني بكلماتكم وأرواحكم الجميله (:


مركب ورق ..بتلمسني جدا الأغنية دي


الأحد، 28 فبراير، 2010

يوم فى حب أطفال محتاجين لنا


23-2
يوم الاحتفال القومى بأطفال الشوارع الاحتفال بطفولتهم وببراءتهم ،يوم نفكرهم فيه إننا بنحبهم، إننا حاسين بيهم ومش ناسينهم،ومش يوم بس لكن هو بداية للى جاى ،بداية لأنه بيعرف الناس بإن الأطفال دول أبرياء ومظلومين بجد ،لكن جواهم حب وصدق لو ملا العالم هيعيش فى جنه،فى كتير واخدين فكرة غلط عنهم ،لكن الواضح والحقيقى إنهم مش محتاجين لشيء غير حبنا وعطفنا عليهم ،مش عايزين لعب ولا هدايا عايزين حنان عايزين رحمة.
مش هقدر أوصف إحساسى فى اليوم ده وأنا معاهم،وأول حلم ليا بيتحقق مع أطفال محتاجين لنا ومش هقول أطفال شوارع ،لأنهم بيزعلوا من الكلمة دى ،كنت بحلم من فترة مش بعيدة لو يكون فى احتفال فى يوم لأطفال الشوارع وتكون مناسبة سنوية زى عيد الأم والفالانتين وعيد الطفولة وغيرها من الأعياد،والحمد لله اتحقق الحلم ده ولو كان مش بنفس الشكل اللى بتمناه لكن دى خطوه وأكيد هيتحقق بنفس الشكل في يوم طول ما فى ناس بتحبهم وقلوبها ماليها الخير.
كل اللى أقدر أقوله عن اليوم ده إنى رجعت طفلة بيهم ومعاهم ،كنت بلعب وبجرى معاهم ،وبقى ليا منهم أصحاب كتير وعرفت عناوين المراكز بتاعتهم كل ده فى يوم وفى خلال شوية ساعات صغيرة بالنسبة لى زمن جميل حلم اتمنيت ما أصحاش منه ‘لدرجة إنى بعد انتهاء الاحتفال كنت خارجة وحاسه إنى سايبة قلبى معاهم وبودعهم وحاسه إنهم إخواتى أو أولادى،لكن فى طريقى للبيت كنت فرحانه أوى من جوايا وحاسه إن قلبى بيبتسم وكل اللى حصل خلال اليوم بيمر قدامى فى لوحة جميلة ،معقول الأطفال دى ممكن تعمل كل ده فيا ؟
طول عمرى بحب الأطفال ،لكن تعاطفى بيكون أكتر مع الأطفال اللى بيعيشوا فى جمعيات أو دور أيتام أو فى الشارع،كان نفسى أوى كل أصحابىيكونوا معايا بس عارفه إنهم كانوا مشغولين واللى مش مشغولين للأسف مش بيهتموا بالمواضيع دى بس بعد كده هيهتموا يعنى هيهتموا :D
فى النهاية ممكن تاخدوا منى نصيحة صغيرة أوى وبسيطة لو حد فيكم حس فى لحظة بيأس بحزن بأى نوع من أنواع الملل ،أو فقدان الذات،يدور على طفل ويفرحه ،صدقونى مافيش فى الدنيا أجمل من ابتسامة طفل محتاج لمجرد إنك طبطت على كتفه أو جيبت له هدية بسيطة ،معاهم فعلا لقيت نفسي.


الأحد، 20 ديسمبر، 2009

هلاوس السنه دى وكل سنه

أحيانا بحس إن جوايا كلام كتير أوى مش عارفه أكتبه..زحمة أفكار ..توهان ..خوف..فرح..يأس..أمل ..إلخ من التناقضات
أحيانا برضه بصدق إن أنا عندى شوية جنان ومش بزعل أو بخاف من ده لأن كلنا مش عقلاء تماما ولا مجانين لدرجة وضعنا فى عنبر الخطيرين مثلا،الكمال لله وحده.

بخاف أوىىىىىىىىى دى أكتر حاجه اتعلمتها من السنه اللى فاتت وأفادتنى كتير لأننى بطبيعتى دايما بتعامل مع الناس بحسن نيه وبحب شديد لغاية ما يثبت العكس ،وطبعا مش ملاك ومش طيبه أوى.. إلخ من المصطلحات الحنينه، لكن دى طبيعه ربنا خلقها فياوكمان لأنى مؤمنه جدا إن مافيش بنى آدم اتخلق سيء لكن الظروف هى اللى بتغير الناس ،الخوف بيتحكم فى مشاعرى وبيدى لعقلى الفرصه إنه ياخد القرار السليم .
اتعودت فى كل عام جديد إنى أكتب أحلامى وأمنياتى للعام الجديد فى ورقة وأحرقها فى شمعه والشمعه دى بتفضل طول الليل مشتعله لغاية ما تنصهر لوحدها.السنه اللى فاتت ما عملتش كده ،خرجت آخر يوم فى السنه الجديده وقعدت فى مكان بحبه أوى لوحدى وشربت قهوة سادة تركى بس الويتر اللى خد الأوردر كان مستغرب جدا لدرجة إنه سألنى تلات مرت قهوة سادة ؟؟؟؟؟؟وهو بيقدم القهوة كان بيضحك قلت فى سري هو بيضحك ع القهوة السادة وألا التركى عموماأنا من عشاق القهوة التركى وكل ماهو تركى وخصوصا الجنان التركى.

وأنا بشرب القهوة كنت حاسه باكتئاب غريب بس جميل فى نفس الوقت ،فضلت أفتكر حاجات كتير وآخد قرارات كتير وقدامى شجر الكريسماس بيستعد لإعلان قدوم العام الجديد بعد قليل من الساعات.

مش عارفه هعمل إيه السنه دى؟عموما هو مش من الضرورى إن أعمل حاجه معينه ،خصوصا إن السنين الجديده فعلا مش بحسها جميله زى زمان والخير والحب وكل شيء جميل فيها بيقل تدريجيا .

بس أكتر حاجه بتمناها السنه دى إن الناس تبطل تكدب وتمثل على بعض ،وتحاول مجرد محاوله تحس ببعض مش هيخسروا حاجه يعنى لو عملوا كده .
ده حوار مفتوح لأى حد عايز يقول أى حاجه جواه ،أى حد عايز يتكلم عن أمانيه الجديده؟يفضفض......يتفضل مشكورا بتدوين كلامه على أرض هذا البوست .

 
الميوزيك دى إهداء ليكم بحبها جدا يارب تعجبكم


الأربعاء، 11 نوفمبر، 2009

ليه؟...........

ليه؟
ليه دايما لما نحب أوى أصدقائنا -حبايبنا-اخواتنا ؟....بنتعب أوى بنخاف أوى على زعلهم وعلى مشاعرهم لدرجة اننا ممكن نقتل مشاعرنا وقلوبنا علشانهم؟
ليه مش بنفكر فى مشاعرنا شويه زى ما بنفكر فى مشاعرهم ؟..طيب ليه ربنا خلق الحب فى قلوبنا وليه خلق جوا كل إنسان فينا طاقة حب مختلفة يعنى بتزيد وتقل من شخص للتانى ..أنا شايفه إن كل ما طاقة الحب دى زادت كل ما كان الإنسان جميل وبريء كل ما كان الإنسان إنسان حقيقى ،بس للأسف فى بعض الأشخاص ذوى العقول والقلوب المتحجرة بيشوفوا إن دى سذاجة أو مبالغة فى عطاء الحب !
ربنا خلقنا ليه ؟خلقنا علشان نعمر الأرض ونكون خلفاء ليه ،يعنى أكيد مش هينفع نعمر الأرض غير لو الحب جوانا ،مش هنقدر نتحمل أعباء الدنيا وهمومهاوأحزانها لو مش فى حياتنا الحب ،وكل ما الحب ده زاد كل ما حياتنا زادت قيمتها ومعناها.
المفروض إن الحب اتخلق لسعادة الإنسان مش لتعاسته ،المفروض نقدر الناس اللى بتحبنا ولو مش قادرين على ده يبقى نواجه نفسنا بإن حبهم كتير علينا ،أنا مش بقول كلام صعب تطبيقه ولا مجرد شعارات مثالية ،أنا واجهت نفسي بده لما حسيت قد إيه حب أمى كتييييييير عليا !،قد إيه هى بتسامح وبتنسى !‘قد إيه عندها طاقة حب لو وزعتها على الدنيا كلها هتعيش فى سلام وخير !ومش بقول ده لأنها امى لكن هى دى الحقيقه ،الأم دايما رمز للعطاء والحب اللانهائي،وأجمل وأرق حب فى الكون حب الأم.
ننزل شويه لحبنا إحنا ،هو عيب إن كل واحد فينا تكون جواه طاقة حب كبيره ؟هو عيب إننا نعبر عن حبنا ده للناس اللى بنحبهم ؟
الحب هبه من الخالق وكل ما كان الإنسان جواه طاقة حب كبيره كل ما كان ربنا راضي عنه ،بس ياريت طاقة الحب دى تستغل استغلال سليم ،وياريت الناس اللى بنقدم لهم الحب ده يكونوا فعلا جديرين بيه.
لما يصطدم الحب ده بعالم مادى متجمد ،ويبقى مجرد مشاعر طفولية ساذجة !لما يتقابل بالاستهتار واللامبالاة ،أكيد أكيد هيموت ولو عاش هيتعب أوى وهيؤلم صاحبه أوى،عموما لو حد شايف إن مشاعر الحب الكبيره ممكن تكون مشاعر طفولية ...ياريت كلنا نمتلك المشاعر الطفولية دى ،وياريت نعرف نحب بعض ونخاف على بعض ،ياريت نقتل جوانا الأنانيه والاستهتار بمشاعر الغير،ونواجه نفسنا بعيوبنا بدل ما ندور على عيوب غيرنا .
وفى النهايه نفسى حد يقول لى ليه؟................

كتبت البوست ده لأنى بفتقد أيام طفولتى وكل أصحابى من أيام الطفولة ،وحاسه بثورة على الدنيا بحالها وعلى كل الأوضاع المزعجة الغريبه اللى بنتعامل معاها كما لو كانت عاديه جدا .




الأغنيه دى بتغير الدنيا من حواليا فى لحظة!

الأحد، 4 أكتوبر، 2009

توترررررررررررررررررر


من كام سنه كده وأنا صغيره،مش صغيره أوى يعنى (:كنت نايمه فى هدوء وسلام،وفجأة سمعت صوت دبة رجليها فى البلكونه وقفزاتها السريعه المريعه ،قمت من على السرير وأنا نايمه، تقريبا كده افتكرت نفسى بحلم خير اللهم اجعله خير إنى فى بيت أشباح أو فى زار (:،مسكت البطانيه وفضلت أصرخ وألف فى دايره وأنا نايمه تماما ومغمضه عينيا، وياحرام أختى الصغيره من حزن حظها كانت نايمه جنبى فى اليوم ده صحيت وفضلت تلف ورايا بس من غير البطانيه،بابا صحى على صوتى وجى بسرعه يلحقنى قبل ما أفتكر البطانيه بساط سحرى وأنزل بيها من الدور الخامس!،وبعدين صحانى وفضل يهدينى وفتح البلكونه وعرف مين المجرمه اللى رعبتنى وعملت فيا كل ده طلعت قطة مزعجة ملهاش بيت ولا عيله ولا قلب علشان تعمل كل ده فى واحده بتخاف من خيالها ومن بذر الليمون:(،اتخضيت من خيالى مرة لما النور قطع ومسكت شمعه شفت حد واقف على جنب صرخت وبعدين لقيته بيعمل نفس حركاتى فاكتشفت إنه أنا،وبذر الليمون ده حكايته غريبه شويتين ،وأنا أصغر من كده كمان شويه ،كنت طفله شقيه جدا ودايما أبهدل البيت لماما وهى تتعب وتنظف ،خصوصا بذر الليمون عمرى عمرى ما رميته فى سلة دايما كان ع الأرض ،قالت لى عارفه لو عملتى تانى كده إيه اللى ممكن يحصل لك ؟قلت لها بسرعه وبفضول الأطفال إيه ؟إيه؟ قالت لى هيجرى وراكى بالليل ويشكك زى الدبوس ويقول لك بترمينى ليه؟،بجد صدقتها وفعلا خفت منه ،وبعد ما عرفت إنها كانت خدعه من مامتى حبيبتى،بقيت بحس بارتياب كده وشك فى بذر الليمون!ودى كانت حكايتى مع التوتر والخوف ،أعتقد إن اللى زيى التوتر نفسه هيجى له توتر منها!.

الأحد، 30 أغسطس، 2009

حنين الندى









حنين الندىأكتر اسم بحبه فى حياتى بيجمع مابين اسمى الحقيقى (حنان)واسم صديقة طفولتى وعمرى (ندى)اللى عرفتها لما كنت عايشة فى الكويت.وحشتينى يا ندى ،وحشتينى فوق ما تتخيلى وكفايه إنى أقول لك أول ما بقول وحشتينى يا ندى دموعى بتسبق حروفى علشان تعبر لك عن حبها ليك.مش عارفه أبدأ ازاى وأبدأ بإيه فى كلامى ليك؟ أنا هبتدى من ورا ورا أوى وهفكرك بأجمل ذكرياتنا مع بعض ،وبطفولتنا الجميلة وبكل صفاتنا اللى كنا مشتركين فيها كنا روح واحدة مش مجرد صديقتين عاديين!فاكرة يا ندى أول مرة عرفنا بعض ؟كنا فى أولى ابتدائى ،كانت دى أول مرة أعرف فيها يعنى إيه كلمة صحبتى؟عرفتها معاكى وحبيتها أوى انت اكتر سبب خلانى أحب الصداقة وأحب أصحابى اللى عرفتهم من بعدك .فاكرة كمان لما كنا دايما نروح المدرسة عاملين نفس تسريحة الشعر،وكمان زى المدرسة كنا دايما بنلبس نفس الزى ،حتى فى حبنا للمدرسين كنا دايما بنحب أبلة معينة وبتبقى صاحبتنا وأمنا الحنينة ،والغريب إنها كانت دايما بتكون أبلة العربى مش عارفه ليه (:
فاكرة كمان لما كنا بنتخاصم(،:كنت برجع مع بابا من المدرسة زعلانة وأحكى له كل اللى حصل يقول لى ما تكلميهاش تانى يا حنان لازم يكون عندك كرامة وكلام كده كتير كان وقتها معقد ومش مفهوم ، وكنت أرد وأقول له أنا عمرى عمرى يا بابا ما هكلمها (:لكن أول ما آجى المدرسة تانى يوم وأشوف ابتسامتك الجميلة ومن غير ما حد فينا يصالح التانى نلاقى نفسنا بنسلم على بعض ونحضن بعض زى كل مرة ولما بابا يرجع ياخدنى من المدرسة ويلاقينى مبسوطة وفرحانة يفهم على طول إننا اتصالحنا فيضحك ويقول لى طبعا اتصالحتم.ويوم ما كان حد بيضربنى من الطلبة الكبار أو يزعق لى كنت بتدافعى عنى كويس وتحسسينى بالأمان،ما انت عارفه إنى كنت بخاف أوى(:فاكره كمان لما كنا دايما بنطلع من الأوائل كل سنة مع بعض ،وكمان لما كنا مشتركين فى أنشطة كتير كنت بحب الموسيقى وانت بتحبى الرقص الخليجى كنت بتعلمه منك(:ويوم ما روحنا مع بعض فى رحلة من المدرسة لمبنى الإذاعة والتليفزيون المذيعة سمعتنا أغنية بنحبها احنا الإتنين (حبيبة أمها)حفظتها يا ندى من حبى ليكى.
ولما روحنا رحلة للواجهة البحرية والجناين كان يوم عمرى ما نسيته،لعبنا وضحكنا كتير وسمعنا أغانى لغاية دلوقتى بحبها وبقعد أسمعها وأشوفك معايا.فاكره بقى سوزان صاحبتنا الفلسطينية اللى عرفناها فى آخر سنة لينا مع بعض :(كنا قاعدين احنا التلاتة على طرابيزة واحدة وماكانش يجرؤ حد من المدرسين يفرقنا عن بعض (:علشان عارفين إننا هنعيط وهنعمل دوشة جامدة.
فاكره يا ندى الحفلة اللى عملناها مع بعض برضه فى آخر سنه لينا فى المدرسةأنا عملت ألحان على الأورج وكلمات وعزفناها وغنيناناها مع بعض وكنا الفصل المتميز فى المدرسة (:وآخر يوم شفتك فيه سلمنا على بعض واحنا بنترعش ،وكنا جنب عربيات أبهاتنا وهم بياخدونا من المدرسة مش قادرين نمشى معاهم ولا عارفين نفضل مع بعض !كنت كل ما أفتكر إنى خلاص هسافر بحس إنى سايبة قلبى فى بلد مش بلدى علشان سايباك:( حقيقى يا ندى بحبك لغاية دلوقتى وبتوحشينى كتير ودايما بفتكرك فى نجاحى وفى لحظات فشلى كمان .عارفه يا ندى رجعت الكويت بعد سنتين وسألت عليك انت وسوزان فى المدرسة بس ما لقيتكوش فيها ،واضح إنه كان صعب تفضلى فى مكان أنا مش معاك فيه زى ما أنا كمان ما عرفتش ألاقى نفسى فى مدرسة تانية من بعدك.
اتكلمت كتير بس اللى جوايا أكتر ،ودموعى أكتر واكتر
يا حنا يا حنا ...يا قطر الندى ....يا شباك حبيبى يا عينى جلاب الهوى...فاكره الأغنيه دى يا ندى بتجمع بين اسمى واسمك بفتكرك كل ما أسمعها ،لا انا بفتكرك فى أبسط تفاصيل حياتى ،يا ترى يا ندى بتفتكرينى كده ويا ترى ممكن فى يوم عينيك تقرأ البوست ده؟
ندى صديقتى وتوأم روحى بحبك أوى ،وبتمنى من قلبى إنى فى يوم أشوفك حتى لو فى عالم تانى .
(أغنية أولاد وبنات جيران)

السبت، 22 أغسطس، 2009

حياتهم صعبة لكن....


رغم حياتهم الصعبة بيلعبوا بيفرحوا ويبتسموا ويضحكوا من قلوبهم،كنت ماشية فى الشارع ده وبفكر وبفكر كتير فجأة شفتهم وقفت ووقف عقلى كمان عن التفكير ،لأنهم دخلونى معاهم فى جو المرح والبراءة اللى رسموه لنفسهم .

فى الشارع ده كانت والدتهم قاعدة على الرصيف وماكانتش بتمد إيديها إطلاقا لكن كانت بتقبل أى مساعدة هى كبيرة فى السن وواضح عليها علامات المرض والكبر والبؤس،والبنوتين الحلوين دول كانوا بيلعبوا جنب الشجرة زى الملايكة زى ما انتوا شايفين (:

لما شفتهم كنت مترددة مابين إنى أمشى وألا أصورهم الأول لأنى خفت أجرحهم،وقررت إنى أستأذن من والدتهم وهى رحبت جدا وسمحت لى أصورهم فوقفوا بنفس الشكل اللى انتوا شايفينه وبابتسامتهم اللى بجد تمحى هموم وترسم أفراح.

كان يوم حقيقى ما يتنسيش ،والصورة دى من أجمل الصور اللى صورتها،أكيد كلنا بنحب الأطفال ،لكن لما نشوف أطفال ظروفهم صعبة ..أطفال شوارع بؤساء ،بيضحكوا ويلعبوا وناسيين كل الهموم اللى عندهم ،لازم نفرح ونتفائل ،ونشكر ربنا من قلوبنا .

من وجهة نظرى مشكلة زى مشكلة أطفال الشوارع بالظبط زى أى وباء أو مرض بيخوف ناس كتير ...أحيانا كمان بعتبره عقاب من ربنا لكل النفوس اللاهية علشان لما نشوفهم تعبانين موجوعين أكيد هنتوجع بسببهم وده فى رأيى عقاب من ربنا ،لكن لما نشوف البراءة دى كلها والفرحة دى فى عيونهم ..لازم نشكر ربنا على إنه وهب لينا فرصة نشوفهم فيها فى الحالة الجميلة دى.


أنا باعتبر نفسى مسئولة عنهم ،وهدفى الأول وإن لم يكن الأخير فى حياتى إنى أعمل حاجة لكل أطفال الشوارع وأساعدهم على حياة آمنة هادية ..مستقبل أفضل ..واللى بيساعدنى فى تفكيرى إيمانى بربنا وإخلاصى لقضيتهم...

أتمنى إننا كلنا نعتبر نفسنا مسئولين عنهم ،وما ننساش إننا فى يوم هنتحاسب على الأطفال دول لأن كل واحد فينا عنده قدرات وإمكانيات معينة يقدر يعمل بيها كتييييييييييير علشانهم ،ربنا هيحاسبنا عليها ويسألنا عملنا إيه؟

بس حقيقى جميل جدا لو اهتمينا بيهم وحسينا بيهم لمجرد إننا كلنا إنسان مش علشان حساب ربنا وبس .

ده جروب عملته علشان أطفال الشوارع ...هنا هنتناقش أكتر وهنحدد أهداف معينة كل فترة وأكيد هنقدر ننفذها لأن الجروب نجح جدا السنة اللى فاتت فى تنفيذ أهداف كتير ،والسنة دى كمان عايزين نكمل ونحقق أهداف أكتر ....عايزين نحمى الطفولة البريئة ونحفظ لها حقوقها فى الحياة ........
ورمضان كريم ((: